Club de Lectura Guntín

próxima sesión sobre Orgullo e prexuízo

2012-01-26T12:21:00.003+01:00

No día de onte reunímonos no Club de lectura para comentar o libro El tiempo entre costuras e amosamos as nosas diversas opinións sobre o mesmo. Ao final da reunión acordamos que a próxima obra a ler será o libro de Jane Austen, Orgullo e prexuízo. Aquí tedes un enlace para saber máis da obra, sobre a que faremos a reunión a finais de febreiro.

Se che interesa o formato electrónico desta obra tela aquí en inglés en pdf e castelán en pdf e en castelán en htm.

Esta foto recolle a reunión que tivemos para comentar El tiempo entre costuras.

sesión sobre Mafalda

2012-01-24T13:41:00.000+01:00

Xa podemos ir lendo as obras de Quino, os seus libros de Mafalda, que desde a semana que vén terán reforzos na biblioteca pois imos adquirir novos exemplares para que todos teñamos a oportunidade de lelos.
Se queres saber máis de Quino ou Mafalda, pica aquí para descargar o documento.

Sesión sobre As flores radiactivas de Agustín Fernández Paz

2012-01-18T15:47:00.002+01:00

No recreo de hoxe mércores o grupo de alumnado de ESO comentamos a última obra que lemos dentro das actividades do Club de Lectura deste curso escolar, As flores radiactivas de Agustín Fernández Paz. Gustounos porque é unha novela de acción e sobre unha temática de actualidade. Intentamos buscarlle outros finais alternativos pero finalmente preferimos o que tiña a obra. O que si pareceunos un tanto improbable o final, por moita radiación que poida haber non parece probable que teña o efecto de modificar o comportamento da xente, e menos para mellor.

Finalmente acordamos que a próxima obra que leremos sexan os comics de Mafalda. Imos ler os libriños pequenos pero cada un lerá un número diferente e irémolos intercambiando de aquí á data do exame.

Os que non puidestes vir á reunión, animádevos a ler a obra de Quino, Mafalda, e quedamos na próxima reunión que aínda está por fixar pero probablemente sexa a finais de febreiro.

Felices festas de Nadal e moitos libros

2011-12-16T11:56:00.001+01:00

Se queres ver o folleto de Nadal do Club de lectura, accede a el desde aquí.

Sesión sobre Memorias dun neno labrego

2011-12-15T09:31:00.003+01:00

Onte mércores tivemos a nosa última sesión do Club de lectura de adultos, á que sentimos que non puidesen asistir varios dos membros habituais.

Comentamos a obra Memorias dun neno labrego de Xosé Neira Vilas, obra que nos gustou moito a todas as asistentes e na que puidemos ver o pouso da emigración no autor e mais como ese mundo reflectido na obra xa desapareceu do mundo rural do noso contorno. En cambio tamén vimos como outros aspectos, por exemplo o concepto da morte, todavía están moi presentes na nosa sociedade.

Agora que xa remata o ano, acordamos ir lendo a novela de María Dueñas, El tiempo entre costuras, con vistas á vindeira reunión, que terá lugar en xaneiro, á volta das vacacións de Nadal.

Sesión do Club de lectura en educación infantil 3 e 4 anos

2011-12-09T12:21:00.001+01:00

O mércores 7 de decembro tivemos unha sesión moi especial do Club de Lectura. Estivemos na aula de educación infantil de 3 e 4 anos e lemos dous contos preciosos:

Chucho Cacho de Darío Xohán Cabana
O Pingüín de Teresa Durán

Ademais tivémos a sorte de que nos visitaron os pingüíns do conto.
Ao final fixemos uns debuxos preciosos dos contos: dos pingüíns e do ourizo cacho.

Axudounos moito Eva Fernández Castro que foi quen nos sacou estas preciosas fotos.

As flores radiactivas

2011-11-23T14:10:00.000+01:00

Agustín Fernández Paz

As flores radiactivas

A próxima obra que leremos o alumnado da ESO como actividade do noso Club de Lectura será a obra de Augstín Fernández Paz, As flores radiactivas.

Esta novela ten moita acción e de seguro vos vai encantar. Se queres saber máis, preme neste enlace.

Sesións Memorias dun neno labrego e O señor mago e a folla

2011-11-09T16:06:00.000+01:00

No día de hoxe celebramos dúas sesións do Club de Lectura Guntín.

No grupo de ESO durante o recreo comentamos a lectura do libro de Neira Vilas, Memorias dun neno labrego, escrito en 1951.

Na sesión de Primaria lemos o libro de Toño Núñez, O señor mago e a folla.

Vindeiras reunións do noso club de lectura

2011-11-04T14:22:00.000+01:00

Desde o Club de lectura Guntín, celebraremos dúas próximas reunións recentemente:

Grupo de alumnado mércores 9 no recreo para comentar Memorias dun neno labrego.
Grupo de profesorado xoves 10 para comentar O asasinato de Roger Ackroyd.

Xa nos veremos.

Primeira sesión do Club de lectura do curso 2011-2012

2011-10-19T13:43:00.000+02:00

No día de hoxe tivemos a primeira sesión correspondente ás actividades do club de lectura 2011-2012. Lemos de forma presencial Así foi, doutor de Suso de Toro. Houbo unha importante asistencia á sesión e gustounos moito ó humor deste relato.

Tamén quedamos en ler para a próxima sesión, Memorias dun neno labrego de Xosé Neira Vilas, novela da que se celebra este ano o seu 50 aniversario. Aínda está a data da sesión na que o comentaremos por fixar.

Primeiros libros para este primeiro trimestre

2011-09-28T13:40:00.002+02:00

O grupo de 1º e 2º de ESO ten proposto o libro de Neira Vilas, Memorias dun neno labrego, de 1951. Celebramos agora o seu 50 aniversario e é un libro moi entretido ao tempo que non deixa de ser unha obra clásica.

O grupo de 3º e 4º de ESO leremos como primeira lectura o libro de Agatha Christie O asasinato de Roger Ackroyd, a primeira obra realmente famosa desta famosísima autora de novela negra. Se non leste ningunha dela aínda é un bo libro para comezar. Se queres lelo online, pincha aquí para atopar o texto. Se prefires lelo en papel agarda uns días a que nos cheguen novos exemplares.

O grupo de adultos tamén leremos esta primeira obra de Ágatha Christie.

Tamén temos un grupo de lectura presencial. Nese grupo leremos nesta primeira sesión o relato de Suso de Toro, Así foi, doutor.

E para aqueles do grupo de adultos que queiran ir adiantando traballo, recordámoslles que poden ir lendo a obra de María Dueñas, El tiempo entre costuras, que pola súa lonxitude deixaremos para a volta de Nadal.

Novo curso

2011-09-20T12:08:00.000+02:00

Desde a Consellería de Educación queren animarnos a que leamos e inician unha campaña de promoción da lectura nos centros escolares. Así que... ánimo e a ler!

Novo curso no club de lectura de Guntín

2011-09-13T12:22:00.000+02:00

Iniciamos agora unha nova andaina co noso club de lectura pero fáltanos o fundamental: escoller os libros para este curso.

Cales propós ti? Queremos saber que libros che parece que lles gustaría ler aos teus compañeiros. Escribe un comentario a continuación se queres recomendarnos algunha lectura que che gustase e que penses que nos pode gustar aos demais.

Grazas pola túa aportación.

Excursión do club de lectura

2011-05-31T19:25:00.015+02:00

Se queres lembrar a excursión do club de este ano visita esta presentación.

Anímate!

2011-05-31T17:59:00.001+02:00

Vai de contos...

2011-05-23T10:16:00.003+02:00

O xoves 31 de marzo, os grupos I e II, escoitamos moi atemorizados un relato estremecedor do xenial Edgar Allan Poe: "El retrato oval". E, como lle collemos o gusto a isto dos relatos, decidimos ler na casa:
"O barco da princesa" de Antonio Reigosa
"O vello guardián" de Xosé Neira Vilas
"Le concedo un deseo" de Natalie Babbitt
"Un río de palabras" de Agustín Fernández Paz
"No mire atrás" de Fredric Brown.

Comentario de "The adventures of Huckelberry Finn"

2011-05-22T22:33:00.014+02:00

O xoves 17 de marzo reunímonos, os grupos I e II, para comentar "The adventures of Huckleberry Finn" de Mark Twain. Tivemos a inmensa fortuna de contar coa colaboración de Samuel (o noso auxiliar de conversa) e Ana Mª Arias (xefa do departamento de inglés).

Samuel falounos un pouco da vida de Mark Twain e ensinounos fotos do célebre autor. Co gallo da devandita lectura, aproveitou para presumir de paraxes naturais da súa terra natal facendo especial fincapé no río, que tan importante é neste libro, e a vida que levan os americanos en torno a el. Ana, rememorando a súa infancia, achegounos algúns comics da súa propiedade nos que se narran as aventuras de Huckleberry Finn e o seu famoso compañeiro Tom Sawyer.

Uns días despois, o xoves 31 de marzo, o grupo de adultos tamén comentou a lectura deste libro.

Comentario de "Cartas de inverno"

2011-05-08T10:46:00.002+02:00

O xoves 17 de febreiro, o grupo II comentou a lectura de "Cartas de inverno" de Agustín Fernández Paz e o primeiro que se dixo foi: "Alguén me pode explicar o final?". Así que, xa sabes, anímate a lelo e sácanos de dúbidas!

Comentario de "Maus"

2011-05-08T10:37:00.004+02:00

O xoves 10 de febreiro reunímonos o grupo de adult@s para comentar "Maus" de Art Spiegelman.
En xeral foi unha obra que nos gustou moito. Tod@s coincidimos en que máis que un comic, "Maus" é unha novela gráfica que, ademais de narrar un tema tan serio coma o holocausto nazi, emprega uns diálogos moi coidados e un simbolismo moi acertado á hora de representar as distintas personaxes: os xudeus son ratos, os alemáns son gatos, os polacos son porcos, ...
Na reunión tamén decidimos cal sería a próxima lectura: "The adventures of Huckleberry Finn" de Mark Twain. Os tres grupos do club leremos esta obra podendo elixir o idioma: inglés, galego ou español.

Comentario de "O pazo baleiro"

2011-02-20T15:19:00.004+01:00

O xoves 10 de febreiro reunímonos o grupo I para comentar a lectura de "O pazo baleiro" de Xabier Docampo.
Gustounos moito como Xabier Docampo relata as aventuras dun grupo de rapaces, encabezado por Nicolás, un rapaz atípico que decide que hai outras formas de aprender diferentes da vía escolar.
Nicolás e os seus amigos vennse envoltos na investigación dun misterio que xira arredor dun antigo pazo da súa vila. Cada un aportará o mellor de si mesmo para poder resolver esta intriga.

Próximas lecturas

2011-02-20T14:57:00.002+01:00

As próximas "misteriosas" lecturas que comentaremos no noso club de lectura serán:

-"O pazo baleiro" de Xabier Docampo que leremos os membros do grupo I (1º e 2º ESO).

-"Cartas de inverno" de Agustín Fernández Paz que leremos os membros do grupo II (3º e 4º ESO).

Parabéns á nosa biblioteca!

2011-01-21T13:18:00.003+01:00

A biblioteca do noso centro acadou o 2º premio nacional de bibliotecas escolares. O periódico El progreso fíxose eco desta nova. Así que vos deixo o seguinte vínculo para que curioseedes e poidades presumir de escola.
El progreso (20/01/2011)

Comentario de "La princesa de hielo"

2011-01-19T15:43:00.004+01:00

O 14 de xaneiro reunímonos o grupo de adultos en Lugo para comentar a primeira lectura deste ano: "La princesa de hielo" de Camilla Läckberg. Foi unha reunión moi distendida na que, ademais, tivemos a fortuna de coincidir con outro club de lectura que tamén lerán a devandita novela.
Ademais, suxeriuse como próxima lectura "Maus" de Art Spiegelman.

Comentamos a primeira lectura: "Mi año"

2010-12-20T16:59:00.004+01:00

O xoves 9 de decembro reunímonos para comentar "Mi año" de Taniguchi. A orientadora do centro, María Guerreiro, dirixiu esta sesión aportándonos a súa visión particular da lectura e como experta sobre a síndrome de Down. Foi moi interesante e instructivo. Moitas grazas, María!

O club en contra da violencia de xénero

2010-12-12T12:50:00.003+01:00

O xoves 25 de novembro reunímonos os membros do club para ler o relato "Paciencia" de Paula Carballeira recollido no libro "Camiñan descalzas polas rochas" e publicado por Amnistía Internacional e Tris Tram.

A través da lectura deste impresionante relato reflexionamos sobre as posibles causas desta grande lacra da nosa sociedade.

Primeira reunión do club no curso 2010-2011

2010-10-28T15:48:00.011+02:00

Hoxe tivemos a primeira reunión do club de lectura! Nela comentamos a organización deste novo curso do club e fixemos entrega da primeira lectura. Neste caso, imos ler todos o mesmo. Pero, como somos tantos (que ben!), en posteriores lecturas faremos dous grupos: o grupo I (1º e 2º ESO) e o grupo II (3º e 4º ESO). Mirade que guap@s estabamos:

Esperando impacientemente a primeira reunión deste ano!

2010-10-24T11:32:00.008+02:00

O vindeiro xoves 28 de outubro celebraremos a primeira reunión do club neste curso 10/11 na que entregaremos as primeiras lecturas:

Os grupos I(1º e 2º ESO) e II(3º e 4º ESO) leran, esta vez en común, o cómic "Mi año" de Taniguchi. Dentro dun mes, aproximadamente, volveremonos reunir con María (a nosa orientadora) para que nos faga algún comentario sobre esta lectura xa que, como poderedes comprobar, versa sobre unha temática moi particular.
En canto ao grupo de adultos, a nosa primeira lectura será "La princesa de hielo" de Camilla Läckberg. Unha novela de misterio e suspense para comezar dunha maneira intrigante este curso.

Váisenos a creadora do club.

2010-09-19T19:58:00.008+02:00

Este ano temos que dicirlle adeus a Eva que, moi ao seu pesar, deixa o noso centro para iniciar unha nova andaina por outras terras.

A min só se me ocurre unha palabra que dicirlle: GRAZAS. Grazas por ser como eres e grazas polo inmenso labor realizado durante os dous últimos anos. Estou segura de que ninguén podería nin poderá levar mellor o club de lectura ca ti. Iso si, non dubides que sempre formarás parte do noso club.

Ata o vindeiro curso, lectores!

2010-06-22T15:22:00.008+02:00

Hoxe tivemos a última xuntanza desta xeira, na que comentamos
La ciudad de las bestias, e á que se incorporaron xa os rapaces e rapazas do 3º ciclo de Primaria, ós que animamos para que se unan a nós o próximo curso. Bicos e moitos libros para todos neste verán!

O único que queda...

2010-06-10T20:40:00.006+02:00

Os lectores más vellos deste club tivemos a nosa última xuntanza deste curso onte. Nela comentamos o magnífico libro de relatos O único que queda é o amor, de A. Fernández Paz. Non só combina perfectamente a unidade temática do conxunto coa diversidade argumental de cada historia, senon que emprega unha linguaxe doada de comprender, que facilita a lectura, ó tempo que fai constantes referencias a outras obras literarias contemporáneas, en moitos casos cítanse fragmentos poéticos, que sosteñen gran parte da trama.
Nós achegamos uns versos de J. A. Valente e unha bibliografía á reunión, aproveitando que varios relatos empregan textos deste escritor galego. Non deixedes de mergullarvos nalgún libro del se tedes a oportunidade.
Rematado o noso tempo de lecer en grupo, ben é certo que o único que queda é o amor... polos libros e por todos os máxicos universos recreados neles.
Aquí vos deixamos esta pequena gran biblioteca de recomendacións literarias que enche o corredor de secundaria de amor polos libros e polas súas historias; todos os títulos foron escollidos polo alumnado ou o profesorado deste centro escolar.

Visita de María Reimóndez

2010-05-24T10:24:00.002+02:00

O venres pasado tivemos entre nós a esta escritora, como podedes ver aquí.

Non damos feito

2010-05-19T10:18:00.009+02:00

Aviso para navegantes lectores: o venres día 21 virá visitarnos ó centro unha coñecida escritora galega, non deixedes de achegarvos á biblioteca para participar nesta actividade.
Vaia xornada fixemos o xoves pasado: visitamos a Casa dos Poetas e o Mosteiro de San Salvador en Celanova; a Virxe do Cristal e a Torre da Homenaxe en Vilanova dos Infantes, e Castromao.

Aquí tedes esta imaxe como recordo.

2010-05-13T09:41:00.000+02:00

Non nos esperedes hoxe para traballar. Imos de excursión a Celanova!

últimas novas

2010-05-04T10:57:00.005+02:00

Aviso para os desprevenidos membros do club de lectura que aínda non entregaron a correspondente autorización para a excursión a Celanova do día 13 de maio. Que se acaba o prazo!

A biblioteca mural coa que conmemoramos este ano o Día do Libro e o Día das Letras Galegas, xa está disposta no corredor de Secundaria, para que vaiades colocando nela os vosos títulos recomendados, se aínda non o fixestes.

A segunda edición da Feira do Libro foi de novo todo un éxito, tanto de ventas como de público e o mellor é que os libros foron os verdadeiros protagonistas.

Feira do libro

2010-04-21T16:03:00.008+02:00

Recordámosvos que mañá remata o prazo para facer doazóns para a II Feira do Libro, na que estarán á venda ademais de libros, revistas e materiais audiovisuais de segunda man, en bon estado de conservación. Lembrade que é a beneficio da excursión de fin de curso de 3º e 4º de ESO.

Próximas xuntanzas

2010-04-08T14:27:00.002+02:00

As datas para as próximas reunións son as seguintes: para o grupo de lectura inicial, o xoves 15; o grupo de lectura avanzada, e o grupo de adultos, o mércores 14.

recoller novas lecturas

2010-03-25T14:28:00.008+01:00

Recordade que podedes coller os libros antes das vacacións: Historias para calquera lugar, os de iniciación á lectura; Tristes armas de Marina Mayoral, os de lectura avanzada e a obra para a sección de adultos é Volando solo, de R. Dalh.

2010-03-18T14:55:00.017+01:00

Onte tivemos unha sesión de lectura en francés, moi divertida; Marta levounos un libriño moi ameno coa historia de Olivia e unha tira cómica "d'un enfant terrible" da viñeta suiza, Titeuf.

Que dicir deste pequeno libro-álbum de Ian Falconer, onde a intensidade da infancia é reflectida en só tres cores básicas (vermello, blanco, negro), de maneira que as palabras fican como agachadas, sometidas á sinxeleza cromática e narrativa.

Por outra banda, como presentar a este rapaz inxenioso, estrela no ámbito do cómic francófono, auténtico fenómeno de masas contemporáneo!
O éxito das súas historietas débese ó tratamento descarado, fresco e orixinal de temas máis ou menos escabrosos, como o sexo e o escatolóxico, que o autor fai, sempre evitando o que poida resultar ofensivo. Zep somérxese na perspectiva infantil, insólita e pouco comprensible para o adulto que ten outras coordenadas mentais, e alí xorde o cerne do seu humor.

2010-03-15T10:59:00.004+01:00

Recordámosvos que estamos a elaborar un mural en memoria de Ana Frank, unha rapaza xudía que permaneceu escondida en Amsterdam, durante varios anos, coa súa familia na II Guerra Mundial, e escribiu un diario coa súa experiencia. Morreu no campo de concentración de Bergen-Belsen o 12 de marzo de 1945, uns días antes de que este campo fose liberado polos aliados.

Curioso incidente

2010-03-03T22:54:00.013+01:00

Os máis lonxevos deste club de lectura estivemos a falar hoxe da nosa última lectura en común: a obra de Haddon O curiososo incidente do can a medianoite.
Coma sempre, houbo opinións para todos os gustos, e máis no referente á profundidade e ó realismo na achega á problemática do protagonista. Sen embargo, todos valoramos o interese que ten a obra en relación con aspectos como a inclusión de materiais variados (ecuacións, planos, figuras icónicas...), a trama argumental que arrinca próxima o xénero detectivesco e despois deriva cara a complexa situación persoal e familiar do protagonista, sempre mantendo un ton lúdico e cheo de pingas humorísticas que se manifesta na curiosa perspectiva que ofrece o narrador de todo o que lle ocorre.

A colleita de textos de amor que se realizou o mes pasado, quedou exposta no mural "Vai de amor", como podedes ver nesta imaxe.

11/2/2010
Hoxe fixemos o comentario de Querido hijo: estás despedido.

Xuntanza para o crime

2010-02-10T16:06:00.014+01:00

A reunión de hoxe do club de lectura puxo de manifesto o poder de convicción dunha profe de matemáticas do centro, Bea, que impediu o seu propio asasinato polos voraces lectores de El asesinato del profesor de matemáticas.

Por certo, Bea propúxonos os presentes resolver a idade á que morreu Diofanto, que foi un home da antigüidade tan amante das matemáticas que elexiu este curioso -e problemático- epitafio: "Deus concedeulle ser neno a sexta parte da súa vida, unha duodécima parte posterior dela cubriu de barba a súa faciana; encendeu nel a antorcha do matrimonio tras unha sétima parte e, cinco anos despois, concedeulle un fillo. Un fillo de nacemento tardío que o destino lle arrincou cando alcanzou a metade da súa vida. Consolou a súa aflicción coa ciencia dos números durante os catro anos seguintes, despois dos cales a súa vida de extinguiu".
Cantos anos viviu este ilustre matemático? Pois nada, esperamos as vosas respostas

Datas de próximas xuntanzas

2010-02-04T12:27:00.012+01:00

O grupo de iniciación (Querido hijo: estás despedido) reúnese para comentar o libro o xoves 11 de febreiro; o grupo avanzado (El asesinato del profesor de matemáticas) o mércores 10; e os adultos (El curioso incidente del perro a medianoche) despois do Antroido.
Onte tivemos a xuntanza presencial en inglés,na que
Ana Arias nos achegou algúns versos nesta lingua, nalgúns casos musicados; tamén fixemos unha breve incursión no xénero teatral, e algúns dos asistentes exerceron de David e Sarah. Toda unha aventura!

Mural creativo

2010-01-22T12:20:00.005+01:00

Recordámosvos que podedes participar no mural creativo sobre a Paz que se elaborará ata o día 30 deste mes, contribuindo coa vosa creatividade.

Xuntanza sección adultos

2009-12-17T14:39:00.005+01:00

Os lectores de máis idade deste centro tamén lemos De profundis e comentámolo nunha breve xuntanza nestes días de intensa actividade escolar. As próximas propostas de lectura son El curioso incidente del perro a medianoche, Ollos de auga e El corazón helado; podedes votar por eles na páxina web do centro estes días. Hai que decidir cal é o seguinte antes de Nadal.

Dúas novas

2009-12-03T11:18:00.003+01:00

Esta fin de semana saiu en prensa unha nova relativa a Miguelanxo Prado. A ver se descubrides cal é!
Onte publicouse nun xornal local que o Castro de Viladonga, que aparece nunha das fotos da entrada anterior, foi declarado BIC. Que quere dicir iso? Como se chama o xornal que publicou isto? Cal é a foto deste castro?

Monográfico de Miguelanxo Prado

2009-11-26T13:31:00.013+01:00

A biblioteca do centro foi testemuña onte da primeira xuntanza deste curso, na que se comentou De profundis. O grupo avanzado compartiu uns doces froitos do mar e as súas inquedanzas en relación con esta obra, con imaxes e texto de gran calidade.
Hoxe comentamos A mansión dos Pampín, do mesmo autor, unha lectura lixeira para os comenzan este ano. Un dos temas dos que falamos foi sobre a importancia do nos patrimonio histórico e cultural, en concreto dos castros, en relación co descubrimento que os Pampín fan na súa leira. Velaí fican unhas imaxes destas testemuñas silandeiras do noso pasado.

Novas incorporacións neste curso

2009-11-06T12:41:00.006+01:00

Aquí estamos algúns dos membros deste club.

Primeiras lecturas

2009-11-05T14:36:00.008+01:00

Os libros que imos ler este mes son: De profundis, de Miguelanxo Prado, o grupo A, e A mansión dos Pampín, do mesmo autor, o grupo B. Podedes pasar a recoller os exemplares na biblioteca cando queirades.

Nova xeira de lecturas

2009-09-22T12:25:00.001+02:00

Xa estamos aquí de novo. Ídevos preparando!

Un verán de libros

2009-07-02T13:02:00.005+02:00

Hai, o verán!
Que espazo de tempo tan marabilloso para ler sen entretollos!
Seguro que xa tedes a vosa propia selección elaborada para esta tempada de lecer; de calquera xeito, a biblioteca do CPI Tino Grandío e o Club de Lectura Guntín elaboraron unha proposta de lecturas recomendadas para os máis pequenos, os mozos e os grandes. Podedes acceder a esta selección en http://lecturasveran09.blogspot.com/

Noraboa

2009-06-22T17:53:00.007+02:00

Hoxe conocéronse os gañadores dos concursos para o lema e o logotipo deste club de lectura; o lema, que da pé a iniciar unha conversa sobre libros, creouno Aine Rodríguez Raposo, alumna de 1º de ESO, e o logotipo, Alejandro Vázquez Pérez, alumno de 2º de ESO e participante habitual da sección de lectura na casa. Dámoslles ós dous a noraboa polo seu traballo, esperando que disfruten moito dos seus agasallos, que, non podía ser doutro xeito, son libros.

Convocatoria xurado

2009-06-12T13:33:00.001+02:00

Hoxe, ó longo do horario escolar elíxense o logo e o lema do club de lectura. Recordade tódolos membros e colaboradores tedes que votar! Pasade polo Departamento de Orientación, que é onde están expostos os traballos, antes da hora do xantar.

Data límite para o concurso de lema e logotipo

2009-06-08T14:13:00.007+02:00

Recórdovos que hoxe remata o prazo para participar nos concursos de lema e de logotipo para este club de lectura. Entregádelles os vosos traballos ó profesorado correspondente.

O venres pasado, este club enviou unha representante á xuntanza de Santiago, e mesmo participamos na exposición con algúns materiais elaborados ó longo da nosa andaina, como podedes ver nesta imaxe.

2009-05-28T12:21:00.002+02:00

AI! Que difícil é sobrevivir a final de curso cando unha profesora de Lengua e os rapaces do club de lectura len libros coma este! Eu, malia todo, resistín onte a xuntanza e penso que chegarei enteira a final de curso.

Próxima xuntanza

2009-05-22T23:16:00.001+02:00

O mércores 27 comentarase a última obra de lectura deste curso: El asesinato de la profesora de lengua, de Jordi Sierra i Fabra.

2009-05-15T20:40:00.002+02:00

Hoxe adicamos a sesión presencial á figura de José Ángel Valente. Lemos e desfrutamos do seu poema "El hombre pequeñito". Recomendámosvos que fagades o mesmo.

Así somos nós

2009-05-03T21:31:00.018+02:00

Para que vexades o ben que o pasamos na visita a Padrón e Santiago, ahí vos van estas imaxes, identificádeas: os antroidos, os escusados e os mellores de cada casa

Viaxe

2009-04-28T18:29:00.001+02:00

´Non esquezades que mañá imos de excursión. Sede puntuais.

Actividades do día do libro

2009-04-24T18:35:00.007+02:00

Esta semana a actividade dos membros deste club de lectura foi intensa: organizouse un mercado de libros -como podedes ver nas imaxes-, rexentado polos alumn@s de cuarto, houbo xogos literarios na biblioteca (como "cada ovella coa súa parella")e os alumnos lectores deixaron as súas "pegadas" polos corredores do centro.

Outras recomendacións literarias

2009-04-21T18:14:00.005+02:00

Esta semana levamos ás aulas obras como Madre tierra, padre cielo, unha antoloxía de fotografías e textos dos indios de Norteamérica, na que se recolle o cerne da obra de Curtis.

Aviso

2009-04-15T19:55:00.003+02:00

Recordade que mañá, os membros do club de lectura na casa reunímonos no recreo de despois de xantar para falar de Corredores de sombra, de Agustín Fernández Paz.

Cine club

2009-04-04T18:36:00.002+02:00

A xuntanza de onte non xirou ó redor dunha lectura, senon dun filme. Despois de proxectar La vida es bella, algúns membros do club de lectura e outros afeccionados ó cine, comentamos polo miúdo as esceas e o argumento desta obra mestra contemporánea. Foi fantástico!

2009-04-02T15:18:00.004+02:00

Seguimos percorrendo universos fantásticos deseñados para grandes aventureiros con La historia interminable, de Michael Ende. Seguro que recoñecedes a peza musical central da película que se rodou a partir deste texto.

Un mes de palabras

2009-04-01T10:49:00.005+02:00

Este mes imos facer unha pequena escolla de grandes compañeiros de viaxe para algúns de nós. A primeira recomendación é:
Alicia en el país de las maravillas, Lewis Carrol. Aínda que se considerou moito tempo como unha lectura infantil, reivindicámola como obra de múltiples lecturas e interpretacións, para tódolos públicos.

Taller de escritura

2009-03-30T11:46:00.005+02:00

O venres tivemos unha reunión moi especial: máis que ler, escribimos. A inspiración poética chegou ata Guntín guiada por un vento oriental, e houbo unha choiva fértil de haikus entre os presentes.

vémonos

2009-03-17T00:09:00.004+01:00

A próxima xuntanza será a semana vindeira, esta ímonos de ponte. Aproveitade para ler moito e preparar os artigos para a revista do centro, que está ó saír!

Voilà Paris ce soir

2009-03-15T23:53:00.009+01:00

O venres 13 percorremos as rúas da cidade la luz, coma nun feitizo de meigas, encamiñados por Marta, na procura dun garçon avec un foulard rouge et son chien. Detivémonos no Louvre, para visitar "A Mona Lisa" e falar de Leonardo Da Vinci e da súa obra, dos masóns e do argumento de O código Da Vinci.

Na espera

2009-03-13T13:57:00.003+01:00

Agardamos con curiosidade a sesión de hoxe, na que Marta, a profe de francés, nos levará materiais para a lectura presencial nesta lingua.
Na última xuntanza, o venres pasado, tivemos unha animada conversa entre os membros do club, empregando como motivo principal o libro proposto para a lectura na casa, Leyendas de Bécquer.

Teatro

2009-02-13T16:00:00.007+01:00

Hoxe tivemos unha actividade de lectura en inglés: a obra de teatro The Butler Did It, unha breve e divertida peza de intriga de Walter & Peter Marks que comentamos entre os asistentes.
Tamén hoxe, tódolos alumnos de secundaria fomos e algúns profes presenciamos unha representación teatral "Robinson e Crusoe"

Benvidos!

2009-02-11T16:02:00.004+01:00

Somos un grupo de rapaces/as e profesores/as que dedicamos parte do noso tempo libre a ler e a falar do que lemos (entre outras cousas ;-)