28/10/26

Reunión do club de lectura de profesorado para comentar Los sonetos del amor oscuro de García Lorca

 Hoxe pola tarde tivemos a reunión que estaba programada para comentar a nosa impresión sobre Los sonetos del amor oscuro de Federico García Lorca. Todo o profesorado leu os sonetos e durante a reunión lemos algúns e escoitamos unha gravación de algún máis. En conxunto gustaron moito e destacouse a mestría de García Lorca para compoñer estes poemas.

Tamén se falou da relación destes poemas coa película La bola negra, actualmente nas salas de proxección.


22/10/26

Lectura do Diario de Anne Frank no grupo de banda deseñada

Hoxe o alumnado de 1º de ESO celebrou unha reunión para falar sobre a lectura de El diario de Anne Frank. En conxunto o libro gustou moito a pesar da dureza da historia que se conta e comentáronse diversos aspectos da obra. Falouse de diversos aspectos dos anos que Anne Frank pasou no seu acubillo como pode ser a comida, a dureza da vida, a familia ou o que é vivir nun espazo tan reducido.

O libro gustou moito e puidemos ver tamén a obra en formato orixinal pois contamos nela na biblioteca do Centro.


Primeira reunión do Club de lectura en 5º de EP para ler Astérix

 Hoxe en 5º de EP tivemos a primeira sesión do Club de lectura na que falamos dos libros de Astérix que estivemos lendo e comentamos os aspectos que nos gustaron e que non nos gustaron tanto. Falamos dos personaxes e tivemos un concurso para ver quen sabía máis sobre estes libros.


29/9/26

Únete ao noso Club de lectura para familias!


 

Primeira reunión do Club de profesorado para falar de Punto de araña

Hoxe tocou reunión do club de lectura do profesorado para comentar o libro Punto de araña de Nerea Pallares. En conxunto foi un libro que gustou e coincidimos todos en que a parte final da novela sorprende moito e ten unha complexidade formal que non se espera no inicio da novela.

Falamos tamén da escolla de reflectir a lingua real de Camariñas en lugar de acomodarse ao galego normativo, algo que pode resultar sorprendente pero que lle dá á obra maior realismo. Comentouse tamén a dificultade de poder facer unha tradución que estea á altura da obra orixinal.

Tamén gustou ese saber enlazar os tecidos, as puntillas cos elementos clásicos de tecer e destecer, cos fíos da vida que as moitas gobernan e como o destino é algo que non depende enteiramente de nós.

18/9/26

Comezo de actividades

 Nesta semana comezamos as actividades do noso club de lectura coas reunións previas e o reparto de libros segundo os libros que se decidiu ler en cada grupo. Quedan así as vindeiras lecturas:

*5° de primaria: Libros de Astérix e Obélix

*6° de primaria: Libros de Tintín 

*1° e 2° de ESO: Mentira, de Care Santos

*3° e 4° de ESO: Místicas. Curso do 34, de Álvaro Domínguez 

*Grupo Comic: Diario de Anne Frank



4/7/26

Memoria das actuacións do noso Club de lectura

 Aquí tedes o documento final coas actuacións desenvoltas neste Club de lectura ao longo do curso.




10/6/26

Besta do seu sangue

O grupo de alumnado de 4º da ESO rematou o curso cun libro non específico para alumnado xuvenil, Besta do seu sangue, un libro de Emma Pedreira que desenvolve a figura de Manuel Romasanta, o saca untos que aterrorizou Galicia no século XIX.

Varios dos alumnos víronse sorprendidos polas diferentes caras e facetas deste personaxe, desde a súa complexa identidade sexual, a súa educación, e o cruel dos crimes que cometeu ata a súa detención. E mesmo nese momento o misterio que o rodeaba fixo que a súa morte se apartase do que tería sido habitual.



4/6/26

Excursión do Club de lectura

 Hoxe tivemos a moi desexada excursión do noso Club de lectura de Guntín. O alumnado participante no Club de lectura (de 5º de educación primaria a 4º de ESO) tivo a ocasión de participar na nosa excursión do club de lectura. O prograa da nosa excursión foi o seguinte:

  • Saímos de Guntín ás 8.30 da mañá nun autobús.
  • Chegamos sobre as 10.30 ao Museo Xaquín Marín do Humor en Fene. Neste museo tivemos unha mañá chea de actividades moi amenas:
    • Unha visita á colección de viñetas humorísticas.
    • Espellos deformantes.
    • Explicación sobre a figura de Xaquín Marín, a súa obra e a historia do humor en Galicia.
    • Un obradoiro de caricatura, do que saíron preciosos (e terribles) autorretratos do noso alumnado.
  • Xantar na praia de Miño, para o que tivemos bastante bo tempo dadas as previsións.
  • Visita ao Labirinto Breogán en Vilarmaior.
  • Regreso a Guntín ás 20.30.










3/6/26

O club da calceta

Falando de clubs, no noso club de lectura de familias lemos para rematar o curso, O club da calceta de María Reimóndez, unha obra que nos gustou moito porque sentimos unha enorme identificación con varias das súas protagonistas.

Como membros dun club de lectura que moitas veces dá lugar a conversas interesantes partindo do pretexto do libro, puidemos entender que algo así pasase tamén no club de calceta.

Gustáronnos as protagonistas e gustounos o tema da calceta pois varias de nós tamén gustamos desta afección.

Dado que esta foi a última reunión deste curso, aproveitamos para realizala nunha cafetería local en lugar do noso centro escolar.

Tamén falamos da posibilidade de ampliar este grupiño coa cooperación municipal.

O principiño

 Nunha reunión diferente á de 2º de ESO (polo número de exemplares dispoñibles) puxémonos hoxe a comentar O principiño, falando do autor, da historia do libro, das traducións del con que contamos e, especialmente, coa edición troquelada que temos na biblioteca.

O libro resultou bastante complexo para as lectoras pero aínda así todas saímos da reunión entendendo moito mellor o noso principiño e os diferentes personaxes e planetas que vai atopando.

1/6/26

Amancio Amigo, o meigo de Salamanca

 Hoxe realizamos a última reunión do club de lectura deste curso no grupo de 5º de educación primaria. A nosa lectura foi Amancio Amigo, o meigo de Salamanca.

Chamoume a atención a detallada lectura que estes rapaces e rapazas de 5º de primaria realizaron deste libro que seguía as aventuras de Amancio Amigo, un protagonista que gustou tanto que xa estamos pensando en ler máis das súas aventuras o vindeiro curso.

No seu percorrido desde Galicia a Salamanca coñece todo tipo de personaxes e sucédense as aventuras máis tolas, así que Amancio ten que procurar saír airoso e veremos se acaba por atopar o amor.

27/5/26

I'm Obélix

Quedaba só o grupo de 3º de ESO por comentar I'm Obélix, a novela da que recentemente nos veu falar Raquel Fernández.

Analizamos os diferentes perfís arredor do caso de acoso escolar sufrido por Ismael e falamos de con cales nos identificamos máis. Unha novela que gustou moito este curso.

25/5/26

A avoa gángster





























Igual que se fixo en 1º de ESO e en 5º de primaria, o alumnado de 6º decidiu ler A avoa gángster, un libro que gustou moito en todos os niveis nos que se leu. É unha novela moi británica na que unha avoa cun perfil pouco atractivo loita por ter o favor do seu neto, mesmo se isto implica realizar accións que nunca pensou, só co propósito de que o seu neto a teña en mellor concepto.

Finalmente a novel acaba ben pero dunha forma que dificilmente podiamos pensar ao comezo.

14/5/26

La psicoloxía del dinero

 Aínda que non é unha opción moi popular no noso club, na xornada de hoxe estivemos comentando La psicología del dinero, a tradución ao castelán do famoso libro de Morgan Housel, un libro que se propuxo despois de que á coordinadora lle gustase moito o libro. 

Así a todo, moitos dos participantes coincidiron en que non lles acabou de encher o ollo esta obra porque está moi enfocado ao investimento dentro dun contexto moi estadounidense.



O principiño

 Hoxe xoves 14 de maio o alumnado de 2º de ESO reuniuse para falar do famoso libro do Principiño de Antoine de Saint-Exupéry.

Falamos do simbolismo do libro, de que detrás da súa simplicidade é un libro moi complexo e, en xeral, as alumnas participantes coincidiron en que lles pareceu bastante complexo.

Estivemos vendo varias edicións en diferentes linguas así como unha preciosa edición con pop-ups que temos na nosa biblioteca.

6/5/26

Lectura de La muy catastrófica visita al zoo

 

Esta obra foi a última lida no grupo de familias do noso club de lectura. Debemos dicir que foi unha obra que xa gustara moito ao alumnado de 6º de primaria que pedira especificamente ler esta obra.

Ás familias gustounos moito tamén pero a lectura foi moi diferente. Os temas que tratamos foron os seguintes:

  • o sentido do humor ao longo de toda a obra.
  • o feito de que o punto de vista sexa o dunha alumna presumiblemente pouco fiable.
  • o paradoxo de que a absurda hipótese inicial acabe por ser a acertada.
  • o alumnado con discapacidade que pode ser escolarizado en centros convencionales ou específicos. Nesta novela aparecen as dúas posibilidades.
Unha novela que nos pareceu moi interesante.

4/5/26

Páxina de M8porler

 Na reunión de coordinadores de Clubs de lectura de Galicia, que tivo lugar o pasado 29 de abril en Santiago de Compostela, membros da Fundación Xistral acudiron para explicar como funciona o portal M8porler, que conta cun espazo específico para Clubs de lectura. Dada a súa posible utilidade, os nosos clubs quedaron inscritos ás poucas horas e contamos poder comezar o vindeiro curso utilizando esta plataforma.


Visita de Raquel Fernández ao noso Club

Recentemente contamos coa visita de Raquel Fernández, autora de Contas de buxo e I'm Obélix ao noso club. A autora de Gondomar falou tanto co alumnado da ESO coma co grupo de profesorado e familias sobre o proceso de creación da súa novela, a súa traxectora como escritora, a forma na que os feitos reais vividos por ela inspiraron a novela e detalles de I'm Obélix, a novela que dela que lemos este curso escolar,

Foi moi grata a súa presencia e o que máis sorprendeu, sobre todo no grupo de alumnado foi o feito de que se dedique á cociña e non a algo aparentemente máis relacionado co mundo da escrita.





 

Arrugas e Adelina

O pasado 15 de abril reunímonos o profesorado do Club para falar das últimas dúas lecturas: Arrugas de Paco Roca e Adelina de Sandra Lodi, ilustradora de Lugo.

En conxunto gustáronnos moito as dúas obras pero todas sentimos debilidade pola obra de Paco Roca. Adelina ten un debuxo máis actual  pero ambas lecturas coinciden no complicado de enfrontarse aos últimos anos de vida, onde as capacidades mentais van a menos, e as institucións non sempre están a altura.